Жаңа оқу жылы — жаңа көшбасшылар, жаңа идеялар және бүкіл мектеп қауымдастығы үшін жаңа мүмкіндіктер!
Дәстүр бойынша оқу жылының басында Alpamys School мектебінде оқушылардың өзін-өзі басқару ұйымының Президентін сайлау науқаны өтеді. Сайлауға кандидат ретінде белсенді ұстанымы бар, қатарластарына үлгі бола алатын, команданы соңынан ерте білетін және мектеп өмірін қызықты әрі мазмұнды етуге шын ниетімен ұмтылатын 8–11 сынып оқушылары қатыса алады.
Биыл сайлауалды науқан оқу жылының алғашқы аптасында-ақ қызу басталды. Мектеп оқушылары алдында өз идеялары мен бастамаларын Ксения Мельникова және Сағадат Едіге ортаға салды.
15 ҚЫРКҮЙЕК — ТАҢДАУ КҮНІ
Тікелей дауыс беруге 3–11 сыныптардың 382 оқушысы мен мектептің педагогикалық ұжымы қатысты.
Дауыс беру қорытындысы бойынша:
Ксения Мельникова — 110 дауыс
Сағадат Едіге — 272 дауыс жинады.
Осылайша, 11-сынып оқушысы Сағадат Едіге «Алпамыс» мектебінің Президенті болып сайланды.
Едігені сайлануымен құттықтаймыз! Оған сенімділік, батыл идеялар, жаңа жобалар және бүкіл мектеп отбасының игілігі жолындағы жұмысына табыс тілейміз!
АЛДА — МЕКТЕП ПАРЛАМЕНТІНІҢ САЙЛАУЫ
Жақын арада мектеп парламентінің сайлауы өтеді. 9–11 сынып оқушылары белсенді әрі бастамашыл оқушылардан құралған жаңа команданы қалыптастыруға өз үлесін қоса алады.
Мектеп Президенті мен мектеп парламенті оқушылардың мүддесін білдіріп, мектеп бастамаларын қолдап, Шаңырақтардың (Houses) жұмысын үйлестіреді.
«Егер сіз мектеп көшбасшысы болғыңыз келсе, мектептің дамуына өз үлесіңізді қоспа, қызықты жобаларды жүзеге асырып, оқушыларға көмектескіңіз келсе — мектеп Парламентінің сайлауына қатысуға мүмкіндігіңіз бар», — дейді мектептің жаңа Президенті Сағадат Едіге.
ТӨРТ ШАҢЫРАҚ — БІР МЕКТЕП ОТБАСЫ
Биылғы оқу жылында мектептің барлық сыныптары төрт Шаңыраққа (Houses) біріктірілді. Әр Шаңырақтың өз символы бар:
БАРС • АРЫСТАН • ҚЫРАН • АРЛАН
Бұл бейнелер қазақ халқының тарихи жадында, фольклорында және ұлттық символикасында ерекше орын алады. Олар оқушылар бойында қалыптастыруға ұмтылатын қасиеттерімізді — батылдық, күш, еркіндік, абырой, адалдық, көшбасшылық және бірлікті бейнелейді.
Шаңырақ — жай ғана команда емес. Бұл — ынтымақтастық, өзара қолдау, бастамашылық және салауатты бәсекелестік қалыптасатын орта.
Оқу жылы бойы Шаңырақтар бірнеше бағыт бойынша өзара бақ сынайды:
📚 Білім — білім сапасы, жетістіктер және академиялық нәтижелер.
🎨 Шығармашылық — таланттар, бастамалар және креативті жобалар.
🏆 Спорт — белсенділік, командалық рух және жаңа жетістіктерге ұмтылыс.
Әр тоқсанның және оқу жылының қорытындысы бойынша үздік Шаңырақ анықталады.
Осылайша мектептің өзін-өзі басқару жүйесі жай ғана сайланбалы органдардың жұмысымен шектелмей, әр оқушы өз қабілетін танытып, ортақ іске үлес қосып, мектеп өмірінің бір бөлігі екенін сезінетін үлкен командалық мәдениеттің маңызды бөлігіне айналады.
БІРГЕ — ЖАҢА ИДЕЯЛАР МЕН ЖЕҢІСТЕРГЕ!
Алда жаңа Президент, мектеп парламенті және төрт Шаңырақ үшін жобаларға, іс-шараларға, жарыстарға және жаңа мүмкіндіктерге толы тұтас бір оқу жылы тұр.
Төрт Шаңырақ. Бір мектеп отбасы.
Ортақ мақсат — Alpamys School-ды одан әрі мықты, белсенді әрі қызықты ету!
